नेपाली कांग्रेसका प्रमुख सचेतक श्यामकुमार घिमिरेले संसदमा दिएको भनाइले सम्पूर्ण नेपाली समाजलाई स्तब्ध र आक्रोशित बनाएको छ । उनले धार्मिक पर्यटकहरू पशुपतिनाथ र मुक्तिनाथजस्ता पवित्र स्थलमा आएर कम खर्च गर्ने भन्दै, सरकारलाई यौन व्यवसायलाई वैधता दिनुपर्ने सुझाव दिएका छन् । यस्तो अभिव्यक्तिले हाम्रो समाजको नैतिकता, संस्कार र महिलाहरूको सम्मानमाथि गम्भीर प्रहार गरेको छ ।
नेपाल प्राकृतिक सुन्दरताले भरिपूर्ण देश हो । हिमाल, पहाड, तराईका अनुपम दृश्यहरू, सांस्कृतिक विविधता र ऐतिहासिक सम्पदाले हामीलाई विश्वमा परिचित गराएको छ । यस्तो अवस्थामा, पर्यटन प्रवर्द्धनका लागि यौन व्यवसायलाई वैधता दिनुपर्ने प्रस्ताव गर्नु हाम्रो संस्कार र मूल्यप्रति अपमान हो । महिलाहरूलाई मनोरञ्जनको साधनका रूपमा प्रस्तुत गर्नु अमानवीय र अस्वीकार्य छ ।
महिलाहरू हाम्रो समाजको मेरुदण्ड हुन् । उनीहरूको सम्मान, सुरक्षा र अधिकारको संरक्षण गर्नु हाम्रो कर्तव्य हो । यौन व्यवसायलाई वैधता दिनुले महिलाहरूको अस्मिता र इज्जतमाथि आँच पुर्याउँछ । यस्तो सोचले हाम्रो समाजलाई विकृत मार्गतर्फ धकेल्ने खतरा छ ।
हामीले पर्यटन विकासका लागि हाम्रो सांस्कृतिक सम्पदा, प्राकृतिक सुन्दरता र स्थानीय कला-संस्कृतिलाई प्रवर्द्धन गर्नुपर्छ । यौन व्यवसायलाई वैधता दिनु समाधान होइन, बरु यो हाम्रो समाजको नैतिक पतनको संकेत हो । श्यामकुमार घिमिरेजस्ता जनप्रतिनिधिले यस्तो गैरजिम्मेवार अभिव्यक्ति दिनु लज्जास्पद छ । उनीले आफ्नो भनाइका लागि सार्वजनिक रूपमा माफी माग्नुपर्छ र भविष्यमा यस्ता अभिव्यक्तिबाट बच्नुपर्छ ।
हाम्रो समाजले महिलाहरूलाई सम्मान, सुरक्षा र समान अवसर प्रदान गर्नुपर्छ । पर्यटन विकासका लागि पनि हामीले नैतिकता, संस्कार र मूल्यहरूको संरक्षण गर्दै अघि बढ्नुपर्छ । हाम्रो दिदीबहिनी र छोरीहरुको इज्जत बन्दकी राखेर उनिहरुको अस्मिताको इहलिला समाप्त पारेर बिश्वभरका पर्यटक भित्र्याउदै हाम्रो दिदीबहिनी माथि यौन मनोरञ्जन गराएर देश धनी बनाउने सोच आफैमा कल्पना समेत गर्न सकिन्न ।
नेपाली काङ्ग्रेस जस्तो प्रजातान्त्रिक पार्टी अनि महिला अस्मिताको लागि दशकौ लडेको पार्टीको प्रमुख सचेतकले सार्बभौमसत्ता सम्पन्न संसद सभामा बोलेको यौन व्यवसायलाई वैधता दिने र संसारभरबाट पर्यटक भित्र्याई हाम्रो चेलीबेटीको जीवनको इहलिला बेच्ने घिनलाग्दो सोचलाई कडा रूपमा खारेज गर्दै, हामी सबैले महिलाहरूको सम्मान र सुरक्षामा प्रतिबद्ध रहनुपर्छ ।
- लेखक शुरज मिश्र (शेखर), नेपाली कांग्रेस जिल्ला कार्यसमिती सिन्धुलीका बर्तमान सह-सचिव हुन ।
