सिन्धुली – सिन्धुलीको घ्याङलेख गाउँपालिकाका अध्यक्ष र उपाध्यक्षले शुक्रबार आफू चढ्दै आएको गाडीलाई कोरोना संक्रमित बिरामी बोक्न एम्बुलेन्सको रुपमा प्रयोग गर्न दिने घोषणा गर्नु भएको छ ।
कोरोना भाइरस संक्रमित तथा अरू बिरामीको उपचारका लागि स्रोत साधनको अभाव बढ्दै गएका बेला घ्याङलेख गाउँपालिकाका अध्यक्ष जगतबहादुर भोलन र उपाध्यक्ष दुर्गादेवी सुनुवारले आफु चढ्दै आएको गाडीलाई एम्बुलेन्सका रुपमा प्रयोग गर्न सर्वसाधारणलाई अपिल गर्नुभएको हो ।
उहाँहरुले सामाजिक सञ्जाल फेसबुकमार्फत शुक्रबार आफ्नो भिडियो मन्तव्य सार्बजनिक गर्दै उक्त घोषणा गर्नु भएको हो ।
गाँउपालिका अध्यक्ष भोलनले महामारिका बेला जनतालाई सुविधा दिन आफुले प्रयोग गर्दै आएको गाडी प्रयोग गर्न दिने घोषणा गर्नुभएको हो । उहाँले भन्नुभयो, “गाँउपालिकाको गाडी कोरोना संक्रमण अवधिभर म प्रयोग गर्दिन ।
पालिकामा देखा परेका कोरोनाका बिरामी बोकेर अस्पतालसम्म लैजान दिएको छु ।” कोरोनाका कारण जनतालाई अप्ठेरो नपरोस भनेर आफुले उक्त घोषणा गरेको उहाँले बताउनुभयो ।
त्यस्तै गाउँपालिका उपाध्यक्ष दुर्गादेवी सुनुवारले पनि गाँउपालिकामा एउटा एम्बुलेन्स रहेको र गाँउपालिकामा कोरोनाको बिरामी देखा पर्ने क्रम बढ्दै गएको हुँदा त्यसले धान्न नसक्ने अबस्था भएकोले आफुले प्रयोग गर्दै आएको गाँउपालिकाको गाडी बिरामी बोक्न प्रयोग गर्न दिने घोषणा गर्नुभयो ।
उहाँले भन्नुभयो, “जनतालाई शान्ति, सुरक्षा र अमनचैन दिनु जनप्रतिनिधिको दायित्व पनि हो । त्यसैले हामीले उक्त घोषणा गरेका हौं ।”
