सिन्धुली – सिन्धुलीको कमलामाई नगरपालिकामा एक १८ बर्षिया किशोरी लाई एक दिनको लागि नगरपालिका प्रमुख पदमा नियुक्त गरिएको छ । अन्तराष्ट्रिय बालिका दिवसको अवसरमा उनलाई नगरपालिकाको प्रमुखमा नियुक्त गरिएको हो । बालिका दिवसको अवसर पारेर एक दिनका लागि आर्थिक र प्रशासनिक काम बाहेकका कार्य गर्ने गरी नगरप्रमुखमा नियुक्त गरिएको हो ।
नेतृत्व र निर्णय परियोजना अन्तर्गत नेतृत्व हस्तानतरण डिजिटल पुस्ताः हाम्रो पुस्ता” भन्ने नारालाई सार्थक बनाउन प्लान इन्टरनेसनल नेपालको सहयोगमा जनजाती बिकास समाज सिन्धुलीले आयोजना गरेको कार्यक्रममा १८ वर्षीया स्वस्तिका बख्रेल नगर प्रमुखमा नियुक्त भएकी हुन् । नबनियुक्त बख्रेलले दिनभरका गतिविधिमा प्रमुखको जिम्मेवारी सम्हाल्ने छिन् ।
बालबालिकाहरूले आफ्नो स्थानीय तहलाई कसरी बुझेका छन् र नगरपालिकाको नेतृत्वले कसरी काम गर्छन् भन्ने विषयलाई बालबालिकालाई अनुभूत गराउन यस्तो जिम्मेवारी दिइएको हो ।
अन्तराष्ट्रिय बालिका दिवस मनाउने सन्दर्भमा एक दिन आर्थिक र प्रशासनिक अधिकार बाहेक साङ्केतिक रूपमा नगरपालिकाको प्रमुख बख्रेललाइ बनाइएको हो ।
आज बिहान ८ बजेबाट नगर प्रमुखको लागि छनौट भएकी बख्रेललाई जिम्मेवारी दिएको पत्र सहित पदभार ग्रहण गराइएको थियो । सोही अवसरमा नवनियुक्त नगर प्रमुखलाई स्वागत गरेर निवर्तमान नगरप्रमुख खड्गबहादुर खत्रीले नेतृत्व हस्तान्तरण गरेका थिए ।
नवनियुक्त नगरप्रमुख बख्रेलले आफु बालबालिकाहरु साइबर हिंसाबाट पिडित भएको भन्दै योजना नै बनाएर कार्यान्वयनमा जाने प्रतिवद्धता जनाइन । त्यसैगरी उनले बालिकाको शिक्षा, स्वास्थ र सुरक्षामा योजनाबद्ध रुपमा बिकास र विस्तार गर्ने बताइन् ।
