सिन्धुली १४ मंसिर । सिन्धुलीको कमलामाई नगरपालिका–६ रातमाटास्थित एक हार्डवेयर गोदाममा मंगलबार बिहान आगलागी भएको छ ।
करिब १० बजेको समयमा जिल्ला सदरमुकाम स्थित साह आइरन एण्ड इलेक्ट्रिक सेन्टरमा लागेको आगो दुधौली, बर्दिबास र रामेछापबाट समेत दमकल मगाएर करिब चार घण्टापछी नियन्त्रणमा लिइएको छ ।
जिल्ला प्रहरी प्रमुख एसपी गोविन्द थपलियाले ठूलो आगलागी भएकाले अन्यत्रबाटसमेत दमकल मगाएर आगो नियन्त्रणमा लिइएको जानकारी दिए ।
उनले भने, ‘आगो ठूलो थियो, हाम्रो यहाँको एउटा मात्र दमकलले नसक्ने भएपछि थप तीनवटा दमकल मगाउनुपर्यो । अहिले अवस्था नियन्त्रणमा छ ।’ आगो निभाउन नेपाली सेना, सशस्त्र र नेपाल प्रहरीको टोली परिचालन गरिएको थियो ।
सिकन्दर साह सहित दुई जनाको स्वामित्वमा रहेको उक्त गोदाम रक्सी, वाइवाइ चाउचाउ, इलोक्ट्रीक सामाग्री, हार्डवयर सामाग्रीको गोदाम भएकोले उक्त गोदाममा भएको धेरै सामाग्री जलेर नष्ट भएको एसपी थपलियाले बताए ।
बिजुलीको तार सट भएर आगलागी भएको र क्षतिको एकिन विवरण भने आइनसकेको उनले बताए । सञ्चालक साहका अनुसार आगलागीबाट करोडौंको क्षति भएको छ ।
