सिन्धुली – सिन्धुलीको दुधौली नगरपालिका–२ लामीडाँडास्थित मधुगङ्गा महादेव मन्दिरमा सोमबार एक जना पुरूषको हत्या गरिएको अवस्थामा शव फेला परेको छ ।
जिल्ला प्रहरी कार्यालयका एसपी लालध्वज सुवेदीका अनुसार मृतकको पहिचान खुलेको छ । मृतक भारतको सितामडी भवदेपुर–११ का पंकजकुमार भगत हुन् ।
शव परीक्षणपछि परिवारको जिम्मा लगाउने तयारी भइरहेको एसपी सुवेदीले बताए । मृतकका माइला दाजु रञ्जित भगतले सिन्धुली अस्पतालमा आएर शवको सनाखत गरेका हुन् । सोमबार बिहान उक्त स्थानमा शव फेला परेको थियो ।
प्रारम्भिक अनुसन्धानमा मृतकको छातीमा धारिलो हतियार प्रहार भएको देखिएको एसपी सुवेदीले बताए । घटनास्थलबाट प्रहरीले चुप्पी र खुर्पा बरामद गरेको छ ।
प्रहरीका अनुसार पंकजकुमार साथीहरूसँग मधुगङ्गा महादेवको दर्शन गर्न आएका थिए । घटनाबारे थप अनुसन्धान भइरहेको प्रहरीले जनाएको छ ।
उनीसँगै आएका सबैजना फरार रहेका र घटनामा संलग्नलाई चाँडै पक्राउ गरिने एसपी सुवेदीले बताए ।
